યુવતીની પજવણી કરીને સમાધાન કર્યા બાદ યુવતીના પિતા ઉપર લોખંડના પાઈપથી હુમલો

વાંકાનેર : વાંકાનેરના જુના રાજાવડલા ગામે યુવતીની પજવણી કરવા મુદ્દે થયેલા ઝઘડાનું સમાધાન થઈ ગયું હોવા છતાં આ બાબતનો યુવાન અને તેના પરિવારે ખાર રાખીને યુવતીના પિતા ઉપર લોખંડના પાઈપથી હુમલો કર્યો હોવાનો બનાવ સામે આવ્યો છે. આ બનાવ અંગે યુવતીના પિતાએ 4 શખ્સો સામે હુમલો કરી જાનથી મારી નાખવાની ધમકી આપ્યાની વાંકાનેર શહેર પોલીસ મથકે ફરિયાદ નોંધાવતા પોલીસે વધુ તપાસ હાથ ધરી છે.

આ બનાવની વાંકાનેર સીટી પોલીસ મથકેથી પ્રાપ્ત વિગતો અનુસાર ફરિયાદી ભુપતભાઈ લધુભાઈ સાથલીયા (ઉ.વ.-૪૫ ધંધો-ટ્રક ડ્રાઈવીંગ રહે- ગામ- જુના રાજાવડલા તા.વાંકાનેર) એ આરોપીઓ કિશનભાઇ તેજાભાઈ ટોળીયા, રવિભાઇ તેજાભાઈ ટોળીયા, કાળુભાઇ તેજાભાઈ ટોળીયા, કાનાભાઇ તેજાભાઈ ટોળીયા (રહે-ચારેય-ગામ- જુના રાજાવડલા તા.વાંકાનેર) સામે ફરિયાદ નોંધાવી હતી કે,

ફરીયાદીની દિકરીને આ કામનો આરોપી કિશનભાઇ તેજાભાઈ ટોળીયા એકાદ વર્ષ પહેલા હેરાન કરતો હોય જે બનાવ બાબતે ઘરમેળે સમાધાન થયેલ હોય પણ તેનો ખાર રાખી ફરીયાદી તા.૨૨ ના રોજ જુના રાજાવડલા ગામે ફાકી મસાલો લેવા જતા હતા. ત્યારે આરોપીએ ફરીયાદી સાથે મે તમારી દિકરીને હેરાન કરેલ તે બાબતે તે મારુ શું બગાડી નાખેલ તેમ કહી બોલાચાલી કરી ફરીયાદીને ગાળો આપી ફરીયાદીને ડાબા પગે નળાના ભાગે લોખંડનો પાઈપ મારી ફ્રેક્ચરની ઇજા પહોંચાડી હતી. તેમજ અન્ય આરોપીઓએ ફરીયાદીને જમણા પગે પીંડીના ભાગે લાકડી વતી મુંઢ ઇજા પહોંચાડી ફરીયાદીને જાનથી મારી નાંખવાની ધમકી આપી હતી. આ બનાવની વાંકાનેર પોલીસે ફરિયાદ નોંધી ધોરણસરની કાર્યવાહી હાથ ધરી છે.