આપણા ઘરમાં કેટલીક વસ્તુઓ એવી હોય છે, જે આપણે રોજ જોઈને પણ વાપરતા નથી.
કારણ?
“એ તો મહેમાન માટે છે!”
હા… એ જ સારો કપ. 😄
ઘરમાં રોજ ચા પીવી હોય ત્યારે આપણો જૂનો કપ ચાલે. ક્યાંકથી કિનારી તૂટી ગઈ હોય તો પણ ચાલે. રંગ ઊડી ગયો હોય તો પણ ચાલે.
પણ મહેમાન આવવાના હોય એટલે તરત ઘરમાં શોધખોળ શરૂ થાય—
“પેલા સારા કપ ક્યાં મૂક્યા છે?” 😄
કપ બહાર આવે. ચા બને. મહેમાનને પ્રેમથી પીરસાય. મહેમાન જાય એટલે કપ પાછો કબાટમાં.
ફરી ક્યારે બહાર આવશે?
આગામી મહેમાનની રાહ જોશે!
મજાની વાત એ છે કે આ માત્ર કપની વાત નથી.
ઘરમાં સારી ચાદર હોય—“મહેમાન આવે ત્યારે પાથરીશું.”
સારી પ્લેટ હોય—“ખાસ પ્રસંગે કાઢીશું.”
સારો ડ્રેસ હોય—“કોઈ સારા પ્રસંગે પહેરીશું.”
સારો પરફ્યુમ હોય—“ક્યારેક ખાસ દિવસે વાપરીશું.”
અને આમ કરતાં કરતાં ઘણી સારી વસ્તુઓ કબાટમાં જ સારી રહે છે.
પણ એક સવાલ છે…
આપણે સારી વસ્તુઓ વાપરવા માટે પણ મહેમાનની રાહ કેમ જોઈએ છીએ?
મહેમાનનું સન્માન થવું જોઈએ, તેમાં કોઈ શંકા નથી.
પણ પોતાના માટે સારી વસ્તુ વાપરવી એ શું ખોટું છે?
ક્યારેક આપણે જાણે પોતાની જ ખુશીને પણ “ખાસ દિવસ” માટે સાચવી રાખીએ છીએ.
આજે સારો કપ કાઢીએ તો શું થઈ જશે?
ચા તો એ જ રહેશે. કપ થોડો સારો હશે. પણ કદાચ ચા પીવાની મજા થોડી વધારે થઈ જશે.
અને કદાચ એ સારો કપ વાપરતાં આપણને સમજાશે કે સારી વસ્તુનો આનંદ લેવા માટે કોઈ ખાસ પ્રસંગની જરૂર નથી.
આપણે ઘણી વખત વસ્તુઓ બચાવતા બચાવતા તેનો સમય જ પસાર કરી નાખીએ છીએ.
સારી ચાદર વર્ષો સુધી કબાટમાં પડી રહે છે. સારો કપ વર્ષો સુધી ડબ્બામાં રહે છે. સારો ડ્રેસ પ્રસંગની રાહ જોતો રહે છે.
અને પછી એક દિવસ ખબર પડે કે વસ્તુ જૂની થઈ ગઈ… અને એ “ખાસ દિવસ” આવ્યો જ નહીં.
એટલે આજે એક નાનકડો પ્રયોગ કરીએ.
કબાટ ખોલો.
જે વસ્તુ તમે કોઈ ખાસ દિવસ માટે સાચવીને રાખી છે, એમાંથી એક વસ્તુ બહાર કાઢો.
અને આજે જ વાપરો.
મહેમાન આવે ત્યારે સારો કપ કાઢવો ઠીક છે…
પણ ક્યારેક પોતાને પણ મહેમાન સમજીને એ કપમાં ચા પીજો! ☕😄
કપ્તાનની વાત…
જીવનમાં બધું જ કોઈ ખાસ દિવસ માટે સાચવી રાખવાની જરૂર નથી.
કેટલીક સારી વસ્તુઓનો આનંદ આજે જ લઈ લેવો જોઈએ.
કારણ કે “ખાસ દિવસ”ની રાહ જોતા-જોતા ક્યારેક સામાન્ય દિવસોની સુંદરતા જ ચૂકી જઈએ છીએ.
