🚑 108 એમ્બ્યુલન્સમાં સફળ ડિલિવરી – માતા અને બાળક સુરક્ષિત

વાંકાનેર: મોરબી જિલ્લાના વાંકાનેર તાલુકાના ચાંચડીયા ગામની રહેવાસી રામુબેન સાદુરભાઈ (ઉંમર 36)ને પ્રસવ વેદના શરૂ થતાં 108 એમ્બ્યુલન્સ દ્વારા હોસ્પિટલ લઈ જવામાં આવી રહ્યા હતા.
પરંતુ ચંદ્રપુર હાઈવે પર મસ્જિદ સામે પહોંચતા અચાનક દુખાવો વધારે વધતા એમ્બ્યુલન્સમાં જ તાત્કાલિક ડિલિવરી કરવાની સ્થિતિ ઊભી થઈ હતી.

આ ગંભીર પરિસ્થિતિમાં 108ના EMT હિતેશભાઈ ઝાપડાએ ધીરજ અને કાળજીપૂર્વક કામગીરી કરી. બાળકના ગળામાં નાળ વીંટાયેલી હતી અને વજન પણ ઓછું હોવાને કારણે પરિસ્થિતિ જોખમી બની હતી. તેમ છતાં હિતેશભાઈએ કુશળતાથી ડિલિવરી કરાવી માતા અને બાળકને સુરક્ષિત રાખ્યા.

ડિલિવરી બાદ પાયલોટ રવિભાઈ દેવમુરારીની મદદથી માતા અને નવજાત બાળકને તાત્કાલિક રીતે હોસ્પિટલ પહોંચાડવામાં આવ્યા, જ્યાં બંનેની તબિયત હાલ સ્થિર હોવાનું જાણવા મળ્યું છે.

આ ઘટના ફરી એકવાર 108 એમ્બ્યુલન્સ સેવા સાથે જોડાયેલા કર્મચારીઓની ઝડપી સેવા, સમર્પણ અને માનવતાનું ઉત્તમ ઉદાહરણ બની છે.