ગુજરાતમાં ફરી ‘માવઠા’ની આફત: ઉનાળાની કાળઝાળ ગરમી વચ્ચે વરસાદની આગાહી

કમોસમી વરસાદથી કેરી અને ઉનાળુ પાકને નુકસાનની ભીતિ; જગતના તાતની ચિંતામાં થયો વધારો

અમદાવાદ: ગુજરાતમાં એકતરફ ઉનાળાની કાળઝાળ ગરમી પડી રહી છે, ત્યાં બીજીતરફ હવામાન વિભાગે ખેડૂતોની ચિંતામાં વધારો કરતા માઠા સમાચાર આપ્યા છે. વેસ્ટર્ન ડિસ્ટર્બન્સની અસરને પગલે રાજ્યમાં આગામી 19 થી 21 એપ્રિલ દરમિયાન કમોસમી વરસાદ એટલે કે ‘માવઠું’ પડવાની પ્રબળ શક્યતા સેવાઈ રહી છે. ખાસ કરીને દક્ષિણ ગુજરાત, મધ્ય ગુજરાત અને સૌરાષ્ટ્રના વાતાવરણમાં મોટો પલટો આવવાની આગાહી કરવામાં આવી છે.

ત્રણ દિવસ ક્યાં કેવો રહેશે વરસાદી માહોલ?
હવામાન વિભાગના જણાવ્યા અનુસાર, વરસાદી સિસ્ટમની અસર આજથી જ જોવા મળશે:
19 એપ્રિલ: આજે મહીસાગર, દાહોદ અને અમરેલી જિલ્લામાં હળવા વરસાદની શક્યતા છે. જ્યારે છોટા ઉદેપુર અને ભાવનગરમાં વાદળછાયું વાતાવરણ રહેશે.
20 એપ્રિલ: આવતીકાલે વરસાદનું જોર વધશે. અમરેલી, ભાવનગર ઉપરાંત દક્ષિણ ગુજરાતના તાપી અને ડાંગ જિલ્લામાં ગાજવીજ સાથે વરસાદ પડી શકે છે.
21 એપ્રિલ: વરસાદી સિસ્ટમ આગળ વધતા ભરૂચ અને સુરત સહિતના વિસ્તારોમાં માવઠું પડી શકે છે. સૌરાષ્ટ્રમાં અમરેલી અને ભાવનગરમાં સતત ત્રીજા દિવસે પણ વરસાદી માહોલ યથાવત રહી શકે છે.

ખેતી પાકો પર તોળાતું જોખમ
આ કમોસમી વરસાદને કારણે ખેડૂતોમાં ભારે ફફડાટ જોવા મળી રહ્યો છે. હાલમાં ઉનાળુ પાક કાપણીની અવસ્થામાં છે, ત્યારે અચાનક વરસાદ પડવાથી નીચે મુજબના પાકોને નુકસાન થઈ શકે છે:
કેરીનો પાક: ખાસ કરીને અમરેલી અને ભાવનગર પંથકમાં કેસર કેરીના પાકને આ માવઠું ભારે પડી શકે છે.
ઉનાળુ પાક: ખેતરોમાં ઉભેલા બાજરી અને તલ જેવા પાકોમાં પલળવાથી ગુણવત્તા બગડવાની અને ઉત્પાદન ઘટવાની ભીતિ છે.
હવામાનમાં આવેલા આ અચાનક બદલાવને કારણે વહીવટી તંત્ર દ્વારા પણ ખેડૂતોને સાવચેત રહેવા અને કાપણી કરેલો પાક સુરક્ષિત સ્થળે ખસેડવા સૂચના આપવામાં આવી છે.