હવે ગોદળા કાઢી રાખજો: ગુજરાતમાં શિયાળા શરૂઆત, 16 જિલ્લામાં તાપમાન 20 ડિગ્રીથી નીચે, આજ રાતથી ઠંડીનું જોર વધશે.

રાજ્યમાં છેલ્લા કેટલાક દિવસથી ચાલી રહેલા કમોસમી વરસાદના માહોલમાંથી આખરે રાહત મળી છે અને હવે ગોદળા કાઢી રાખવાનો સમય આવી ગયો છે, હવે ગુજરાતમાં શિયાળાનું સત્તાવાર આગમન થઈ ગયું છે. છેલ્લા ચાર દિવસથી વાતાવરણ બદલાયું છે, અને વહેલી સવારે તેમજ મોડી રાત્રે ગુલાબી ઠંડીનો જોરદાર અહેસાસ થઈ રહ્યો છે. આ બદલાવ સાથે રાજ્યના 16 જિલ્લાઓમાં તાપમાન 20 ડિગ્રી સેલ્સિયસથી નીચે નોંધાયું છે.

મુખ્ય શહેરોમાં પારો ગગડ્યો

કમોસમી વરસાદી સિસ્ટમ દૂર થતાં જ વાતાવરણ સૂકું અને ઠંડુ બન્યું છે. તાપમાનના આંકડા જોઈએ તો:

• અમદાવાદમાં સિઝનમાં પહેલીવાર 17 ડિગ્રી તાપમાન નોંધાયું.
• નલિયામાં સૌથી ઓછું 16.2 ડિગ્રી તાપમાન નોંધાયું.
• મુખ્ય શહેરો: ગાંધીનગરમાં 16.5 ડિગ્રી, ડીસામાં 16.3 ડિગ્રી, વડોદરામાં 16.6 ડિગ્રી, અમરેલીમાં 16.6 ડિગ્રી, કંડલામાં 17 ડિગ્રી, રાજકોટમાં 18.5 ડિગ્રી અને ભૂજમાં 18.8 ડિગ્રી તાપમાન નોંધાયું છે.

આજ રાતથી ઠંડીનો ચમકારો વધશે

હવામાન વિભાગે આગાહી કરી છે કે રાજ્યમાં આજ રાતથી ઠંડીનું જોર વધુ વધશે.

• તાપમાનમાં ઘટાડો: પવનની દિશા ઉત્તર-પૂર્વથી પૂર્વ તરફની થતા ઉત્તરીય ઠંડા પવનો રાજ્યમાં પ્રવેશ કરશે. જેના કારણે રાજ્યના મોટાભાગના જિલ્લાઓમાં લઘુત્તમ તાપમાનમાં 2થી 3 ડિગ્રી સેલ્સિયસનો વધુ ઘટાડો થશે.
• અમદાવાદ સહિત રાજ્યના તમામ ભાગોમાં ઠંડીનો ચમકારો અનુભવાશે.

કમોસમી વરસાદના સંકટમાંથી ખેડૂતોને રાહત મળતા, હવે આ ઠંડુ અને સૂકું હવામાન રવિ પાકના વાવેતર માટે અનુકૂળ સાબિત થવાની શક્યતા છે.

Desk: kaptaan