મોરબીની મચ્છુ નદીમાં ઝંપલાવનારા બે યુવાનોનો 19 કલાક પછી પણ પત્તો નથી; SDRF અને ફાયર વિભાગની શોધખોળ ચાલુ
મોરબી: મોરબીની મચ્છુ નદીમાં રેલવે બ્રિજ પરથી પડતું મૂકનારા બે યુવાનોનો 19 કલાકથી વધુ સમય વીતી જવા છતાં કોઈ પત્તો લાગ્યો નથી. ગઈકાલે બપોરે પોણા ત્રણ વાગ્યાના અરસામાં બનેલી આ ઘટના બાદ મોરબી મહાપાલિકાના ફાયર વિભાગ અને ગોંડલથી બોલાવવામાં આવેલી SDRFની ટીમ દ્વારા સતત શોધખોળ ચાલુ છે.
ફાયર વિભાગના અધિકારી જયેશભાઇ ડાકી પાસેથી મળેલી વિગતો મુજબ, પાણીમાં ઝંપલાવનાર યુવાનોના નામ હર્ષદ બળદેવભાઈ પારઘી (ઉં.વ. 20, રહે. વવાણીયા) અને અનિલ કનુભાઈ ભંખોડીયા (ઉં.વ. 27, રહે. વીસીપરા, મોરબી) હોવાનું તેમના પરિવારજનો પાસેથી જાણવા મળ્યું છે.
ઘટના અને શોધખોળ:
ગઈકાલે બપોરે 2:45 વાગ્યે પાડાપુલની બાજુમાં આવેલા રેલવે બ્રિજ પરથી બે યુવાનોએ મચ્છુ નદીમાં છલાંગ લગાવી હોવાની જાણ થતાં જ ફાયરની ટીમ અને સ્થાનિક તરવૈયાઓ ઘટનાસ્થળે પહોંચ્યા હતા. જોકે, મોડી સાંજ સુધી કોઈ સફળતા ન મળતા, ગોંડલ ખાતેથી SDRFની ટીમને મોરબી બોલાવવામાં આવી હતી.
આજે સવારે 10:20 વાગ્યા સુધી (અંદાજે 19 કલાક પછી પણ) SDRFના જવાનો અને મોરબી મહાપાલિકાના ફાયર વિભાગની ટીમ દ્વારા યુવાનોને પાણીમાંથી શોધવાની કવાયત ચાલુ છે.
મુશ્કેલી:
શોધખોળની કામગીરીમાં જોડાયેલા જવાનોને મુશ્કેલીનો સામનો કરવો પડી રહ્યો છે, કારણ કે નદીમાં ગટરનું ગંદુ પાણી ભરાયેલું છે, જેના કારણે યુવાનોને શોધવાની કામગીરી અત્યંત કઠિન બની છે. પરિવારજનોમાં ભારે ચિંતાનો માહોલ છે.
