10મી વાર્ષિક સાધારણ સભામાં પશુપાલકોના હિતમાં નિર્ણય; દૂધનો ખરીદ ભાવ પ્રતિ કિલો ફેટ રૂ.863થી વધારી રૂ.900 કરાયો
મોરબી, તા. 28 સપ્ટેમ્બર : મોરબી જિલ્લા મહિલા સહકારી દૂધ ઉત્પાદક સંઘ લિ. **(મયુર ડેરી)**ની વર્ષ 2025-26ની 10મી વાર્ષિક સાધારણ સભા નવી વાવડી ખાતે આવેલા પટેલ સમાજ વાડીમાં યોજાઈ હતી. આ સભામાં પશુપાલકોના હિતમાં દૂધના ખરીદ ભાવમાં પ્રતિ કિલો ફેટે રૂ.30નો વધારો જાહેર કરવામાં આવતા ઉપસ્થિત પશુપાલકોમાં ખુશી જોવા મળી હતી.
સભામાં દૂધનો ખરીદ ભાવ પ્રતિ કિલો ફેટ રૂ.863થી વધારીને રૂ.900 કરવાનો નિર્ણય જાહેર કરવામાં આવ્યો હતો. ચેરમેન સંગીતાબેન કગથરા દ્વારા કરાયેલી આ જાહેરાતને ઉપસ્થિત સભાસદોએ તાળીઓના ગડગડાટ સાથે વધાવી લીધી હતી.
સભાની શરૂઆતમાં મયુર ડેરીના મેનેજિંગ ડિરેક્ટર સુમિત કુમારા દ્વારા સૌનું સ્વાગત કરવામાં આવ્યું હતું. ત્યારબાદ ચેરમેન સંગીતાબેન કગથરા દ્વારા વર્ષ 2025-26 દરમિયાન સંઘ દ્વારા કરવામાં આવેલી કામગીરી અને પ્રગતિનો વિગતવાર અહેવાલ રજૂ કરવામાં આવ્યો હતો.
અહેવાલ મુજબ, વર્ષ દરમિયાન 307 દૂધ મંડળીઓ મારફત સરેરાશ 1.35 લાખ કિલો દૂધનું સંપાદન કરવામાં આવ્યું હતું. સંઘનું વાર્ષિક ટર્નઓવર રૂ.275.02 કરોડ નોંધાયું હતું, જ્યારે વર્ષના અંતે સંઘે રૂ.97.23 લાખનો ચોખ્ખો નફો કર્યો હતો.
વર્ષ દરમિયાન પશુપાલકોને સરેરાશ પ્રતિ કિલો ફેટે રૂ.863ના ભાવે દૂધના નાણાં ચૂકવવામાં આવ્યા હતા. આ ઉપરાંત દૂધ મંડળીઓ મારફત પશુપાલકોને 1,912 મેટ્રિક ટન અમૂલ દાણ પૂરું પાડવામાં આવ્યું હોવાનું સભામાં જણાવાયું હતું.
સભામાં મયુર ડેરી દ્વારા પશુપાલકો માટે ચલાવવામાં આવતી વિવિધ કલ્યાણકારી પ્રવૃત્તિઓ અંગે પણ માહિતી આપવામાં આવી હતી. જેમાં પશુ સ્વાસ્થ્ય અને ઓલાદ સુધારણા, સહકાર વિકાસ કાર્યક્રમ સહિતની કામગીરીનો સમાવેશ થાય છે.
આ ઉપરાંત દૂધ ઉત્પાદક સભાસદના મરણ પ્રસંગે રૂ.80 હજારની સહાય તથા અકસ્મિક મૃત્યુના કિસ્સામાં રૂ.5 લાખ સુધીની વીમા સહાય અંગે પણ સભાસદોને માહિતી આપવામાં આવી હતી.
દૂધના ખરીદ ભાવમાં કરાયેલા રૂ.30 પ્રતિ કિલો ફેટના વધારાને પગલે મોરબી જિલ્લાના દૂધ ઉત્પાદક પશુપાલકોને દૂધના વેચાણથી મળતા વળતરમાં વધારો થશે.
#MayurDairy #MorbiDairy #Morbi #MilkPrice #DairyFarmers #Pashupalak #MilkProducers #MorbiNews #KaptaanNews
