વાંકાનેરના તીથવાની પરણીતાને સાસરિયાનો ત્રાસ: પતિ સહિત પાંચ સામે પોલીસ ફરિયાદ

ઘરકામ અને નાની બાબતોમાં મેણા-ટોણા મારી શારીરિક-માનસિક દુઃખ આપતા હોવાનો આક્ષેપ; પોલીસે તપાસ હાથ ધરી

વાંકાનેર: દીકરીને વળાવતી વખતે સુખી સંસારના આશીર્વાદ આપવામાં આવે છે, પરંતુ ક્યારેક સાસરિયા પક્ષની જીદ અને કંકાસ પરણીતા માટે નરક સમાન બની જતી હોય છે. વાંકાનેર તાલુકાના તીથવા ગામે પિયરમાં રહેતી એક પરણીતાએ તેના પતિ અને સાસુ-સસરા સહિત પાંચ સભ્યો સામે ઘરેલુ હિંસા અને માનસિક ત્રાસની ફરિયાદ નોંધાવતા ચકચાર મચી ગઈ છે.

ચડામણી કરી અવારનવાર હેરાનગતિ
બનાવની વિગતો મુજબ, તીથવા ગામે હાલ પિયરમાં રહેતા નુસરતબેન જીયાઉદ્દીનભાઈ બાદી (ઉ.વ. 36) એ વાંકાનેર તાલુકા પોલીસ મથકે ફરિયાદ નોંધાવી છે. જેમાં જણાવ્યા અનુસાર, પાંચદ્વારકા ગામે રહેતા તેમના પતિ જીયાઉદ્દીનભાઈ અબ્દુલભાઈ બાદી, સસરા અબ્દુલભાઈ મામદભાઈ, સાસુ રોશનબેન, કાકાજી સસરા અલીભાઈ અને કાકાજી સાસુ જેનમબેન દ્વારા તેમને અવારનવાર શારીરિક અને માનસિક ત્રાસ આપવામાં આવતો હતો.

ઘરકામ અને નાની વાતોમાં મેણા-ટોણા
ફરિયાદમાં વધુમાં આક્ષેપ કરાયો છે કે, સાસરિયાઓ દ્વારા ઘરકામ જેવી સામાન્ય બાબતોમાં અવારનવાર તકરાર કરવામાં આવતી હતી. પરિવારના સભ્યો એકબીજાની ચડામણી કરી નુસરતબેનને નાની-નાની વાતોમાં મેણા-ટોણા મારતા અને હેરાન પરેશાન કરતા હતા. સાસરિયા પક્ષના આ અસહ્ય ત્રાસથી કંટાળીને અંતે પરણીતાએ કાયદાકીય શરણ લીધું છે.
પોલીસે ગુનો નોંધી કાર્યવાહી શરૂ કરી

પરણીતાએ નોંધાવેલી આ ફરિયાદના આધારે વાંકાનેર તાલુકા પોલીસે પતિ સહિત પાંચેય સાસરિયાઓ સામે ગુનો દાખલ કર્યો છે. પોલીસે આ મામલે તપાસ શરૂ કરી છે અને આરોપીઓને પકડવા માટે તજવીજ હાથ ધરી છે.