વાંકાનેરમાં જુગારધામ પર પોલીસ ત્રાટકી: પાંચ શખ્સો ઝડપાયા, ₹27,550નો મુદ્દામાલ જપ્ત

વાંકાનેર: વાંકાનેર તાલુકા પોલીસ ટીમે જુગારની ચોક્કસ બાતમીના આધારે દરોડો પાડી જાહેરમાં જુગાર રમતા પાંચ ઈસમોને રોકડ રકમ અને મોબાઈલ ફોન સહિત કુલ ₹27,550ના મુદ્દામાલ સાથે ઝડપી પાડ્યા હતા. પોલીસે તમામ આરોપીઓ વિરુદ્ધ જુગાર ધારાની કલમ હેઠળ ગુનો નોંધી કાયદેસરની કાર્યવાહી હાથ ધરી છે.

પોલીસ સૂત્રો પાસેથી મળતી માહિતી મુજબ, વાંકાનેર તાલુકા પોલીસ ટીમને ખાનગી બાતમી મળી હતી કે વાંકાનેરના માટેલ-વીરપર રોડ પર રીચ ચોકડી નજીક એક ઓરડીની પાછળ કેટલાક શખ્સો જાહેરમાં જુગાર રમી રહ્યા છે.
આ બાતમીના આધારે પોલીસે તાત્કાલિક દરોડો પાડ્યો હતો. પોલીસે સ્થળ પરથી જુગાર રમતા પાંચ શખ્સોને ઝડપી પાડ્યા હતા, જેમાં (૧) દિનેશભાઈ કાજુભાઈ જખાણીયા, (૨) બાબુભાઈ ધમાભાઈ સારલા, (૩) ઉમેશભાઈ વેલજીભાઈ બાવરવા, (૪) વેજુભાઈ જોરૂભાઈ સાડમીયા, અને (૫) રાજુભાઈ લાલજીભાઈ ચૌહાણનો સમાવેશ થાય છે.

પોલીસે પકડાયેલા આરોપીઓ પાસેથી જુગારમાં ઉપયોગમાં લેવાયેલી રોકડ રકમ અને પાંચ મોબાઈલ ફોન સહિત કુલ ₹27,550નો મુદ્દામાલ કબજે કર્યો હતો. તમામ પાંચેય આરોપીઓ વિરુદ્ધ જુગાર ધારાની કલમ હેઠળ ગુનો નોંધી આગળની કાયદેસરની કાર્યવાહી હાથ ધરવામાં આવી છે. વાંકાનેર પોલીસે જુગાર પ્રવૃત્તિને ડામવા માટે સખત કાર્યવાહી કરી હોવાથી આ વિસ્તારમાં જુગાર રમતા તત્વોમાં ફફડાટ ફેલાયો છે.