કોર્ટના હુકમનો અનાદર સુરતના પૂર્વ PIને ભારે પડ્યો: કસ્ટડીમાં લેવાના આદેશથી પોલીસ આલમમાં મચ્યો હડકંપ

હત્યાના કેસની સુનાવણીમાં વારંવાર ગેરહાજર રહેતા કોર્ટે લાલ આંખ કરી: છેવટે માફી માંગતા મામલો થાળે પડ્યો

સુરતમાં ફરજ બજાવી ચૂકેલા અને હાલ ભરૂચના દહેજમાં કાર્યરત પોલીસ ઇન્સ્પેક્ટર (PI) એચ.બી. ઝાલાને કોર્ટના હુકમની અવજ્ઞા કરવી મોંઘી પડી છે. વર્ષ ૨૦૨૩ના એક હત્યાના કેસમાં જુબાની માટે વારંવાર સમન્સ અને વોરંટ છતાં હાજર ન રહેતા કોર્ટે તેમને કસ્ટડીમાં લેવાનો આદેશ કરતા કોર્ટ પરિસરમાં સન્નાટો વ્યાપી ગયો હતો.

શું હતી સમગ્ર ઘટના?
જાન્યુઆરી-૨૦૨૩માં સુરતના લિંબાયત વિસ્તારમાં જમવા બાબતે થયેલી તકરારમાં ચેતન ગુપ્તા નામના શખ્સે શબ્બીર ઉર્ફે પપ્પુ ખાનને માથાના ભાગે હથોડી મારી મોતને ઘાટ ઉતાર્યો હતો. આ હત્યાના કેસની તપાસ તત્કાલીન PI એચ.બી. ઝાલા કરી રહ્યા હતા. ત્યારબાદ તેમની બદલી ભરૂચના દહેજ ખાતે થઈ હતી.

કોર્ટની નારાજગી અને કસ્ટડીનો હુકમ
હત્યાના આ કેસની સુનાવણી સુરત કોર્ટમાં ચાલી રહી છે. તપાસ અધિકારી તરીકે PI ઝાલાને જુબાની આપવા માટે કોર્ટ દ્વારા અનેકવાર સમન્સ પાઠવવામાં આવ્યા હતા અને ત્યારબાદ વોરંટ પણ ઇશ્યૂ કરાયું હતું. તેમ છતાં તેઓ ગેરહાજર રહેતા કોર્ટે કડક વલણ અખત્યાર કર્યું હતું.
શનિવારે જ્યારે PI ઝાલા કોર્ટમાં હાજર થયા, ત્યારે કોર્ટે તેમના જૂના વર્તનને ધ્યાને લઈ તેમને કસ્ટડીમાં લેવાનો હુકમ કર્યો હતો. આ આકરા આદેશથી કોર્ટમાં હાજર વકીલો અને પોલીસ અધિકારીઓ આશ્ચર્યચકિત થઈ ગયા હતા.

માફી માંગ્યા બાદ જુબાની લેવાઈ
પોતાને કસ્ટડીમાં લેવાના હુકમ બાદ PI એચ.બી. ઝાલાએ પોતાની ભૂલ સ્વીકારી કોર્ટની બિનશરતી માફી માંગી હતી. કોર્ટે તેમની નમ્રતા અને માફીને ધ્યાને રાખી વોરંટ રદ કર્યું હતું અને ત્યારબાદ તેમની વિધિવત જુબાની લેવામાં આવી હતી. આ કિસ્સો સરકારી અધિકારીઓ માટે કોર્ટના આદેશોનું પાલન કરવા બાબતે લાલબત્તી સમાન સાબિત થયો છે.