વાંકાનેર: વાંકાનેર શહેરની અમરનાથ સોસાયટીમાં રહેતા એક નાગરિકનું મોટરસાયકલ તેના ઘર પાસેથી જ ચોરી થવાનો બનાવ સામે આવ્યો છે. તસ્કરે ડુપ્લિકેટ ચાવીનો ઉપયોગ કરીને આ વાહન ચોરી કરી હોવાનું અનુમાન છે.
મળતી માહિતી મુજબ, ફરિયાદી મનસુખભાઈ ગોરધનભાઈ જોળિયાએ પોતાનું જીજે – 04 – સીએસ – 2469 નંબરનું મોટરસાયકલ, જેની કિંમત રૂપિયા 25,000 આંકવામાં આવી છે, તે પોતાના ઘર પાસે પાર્ક કર્યું હતું. ગત તારીખ 1ના રોજ કોઈ અજાણ્યો તસ્કર ત્યાં આવ્યો હતો અને ડુપ્લિકેટ ચાવીનો ઉપયોગ કરીને લોક ખોલી અથવા લોક તોડીને આ મોટરસાયકલની ચોરી કરી ગયો હતો.
આ બનાવ અંગે મનસુખભાઈ જોળિયાએ ઈ-એફઆઈઆર નોંધાવી છે. પોલીસે આ મામલે વાહનચોરીની ફરિયાદ નોંધી છે અને અમરનાથ સોસાયટી તેમજ આસપાસના વિસ્તારોના સીસીટીવી ફૂટેજની મદદથી અજાણ્યા તસ્કરને શોધી કાઢવા માટેની તજવીજ શરૂ કરી છે.
