એરપોર્ટ પર હજયાત્રીઓને સીધા પાર્કિંગમાં લઇ જવાશે, ત્યાંજ સ્વાગત-સન્માન કરાશે.

14મી તારીખે હજયાત્રીઓને લઇને આવી રહેલી ફ્લાઇટના આગમન થાય તે પહેલા જ ઇન્ટરનેશનલ એરપોર્ટના પાર્કીંગમાં હજયાત્રીઓના સ્વાગતની તૈયારી કરાશે.

ગુજરાતમાંથી મોટી સંખ્યામાં મુસ્લિમ બિરાદરો હજ યાત્રા માટે ગયા છે. જેઓ 14મી જુલાઇથી પરત આવી રહ્યા છે. હવે આ સમયે જ G20 સમિટ અંતર્ગત મોટી સંખ્યામાં વિદેશી મહેમાનો પણ અમદાવાદ આવી રહ્યા છે. હજયાત્રીઓના સ્વાગત માટે ખૂબ જ મોટી સંખ્યામાં સ્વજનો મોટા વાહનો લઇને એરપોર્ટ પર આવી જતા હોવાથી એરપોર્ટ પર ભીડ થઇ જતી હોય છે.

હવે આ પરિસ્થિતિમાં હજયાત્રીઓને તથા વિદેશી મહેમાનોને અગવડ પડે નહિ તે માટે પોલીસ અધિકારીઓ અને હજ કમિટીના અગ્રણીઓ વચ્ચે એક મીટિંગ મળી હતી. જેમાં ખાસ વ્યવસ્થા ગોઠવવાનું નક્કી થયું છે. ઇન્ટરનેશનલ એરપોર્ટના પાર્કીંગમાં જ ખાસ ટેન્ટ બનાવીને ખાસ વ્યવસ્થા ઉભી કરવામાં આવશે. એરપોર્ટપરથી હજયાત્રીઓને સીધા પાર્કીંગમાં લાવવામાં આવશે. સાથે સાથે હજ કમિટી દ્વારા ઓછા લોકો હજયાત્રીઓને લેવા આવે તેવી અપીલ કરવામાં આવી છે.

એરપોર્ટ પર વ્યવસ્થા જળવાઇ રહે તે માટે હજ કમિટીના હોદ્દેદારોએ ડીસીપી ઝોન-4 કચેરી સાથે એક બેઠક કરી હતી. જેમાં એરપોર્ટ પર વ્યવસ્થા જળવાઇ રહે અને ટ્રાફિકની સમસ્યા ઉભી થાય નહિ તેના માટે ચર્ચા કરવામાં આવી હતી. ડીસીપી ઝોન-4 ડો.કાનન દેસાઇ દ્વારા હજ કમિટીના અગ્રણીઓ સમક્ષ એરપોર્ટ પર કોઇ અવ્યવસ્થા ઉભી થાય નહિ તેવું આયોજન કરવા માટે પ્રસ્તાવ મુક્યો હતો. હજ કમિટી દ્વારા પણ યાત્રીઓને પરેશાની થાય નહિ તેવી વ્યવસ્થા ગોઠવવાનું આયોજન કરાયું હતું. આ આયોજન મુજબ 14મી તારીખે હજયાત્રીઓને લઇને આવી રહેલી ફ્લાઇટના આગમન થાય તે પહેલા જ ઇન્ટરનેશનલ એરપોર્ટના પાર્કીંગમાં યાત્રીઓના સ્વાગતની તૈયારી કરાશે. ટર્મીનલ બિલ્ડિંગ પરથી સ્વયંસેવકો તેમને લગેજ સાથે પાર્કીંગમાં લાવશે અને ત્યાં તેમનું સ્વગત કરી તેમને ઘરે લઇ જવાશે. આ ઉપરાંત હજ કમિટી દ્વારા પણ હજયાત્રીઓને લેવા ઓછા લોકો આવે તેવી વિનંતી કરવામાં આવી છે.

સ્થાનિક પોલીસ પણ વ્યવસ્થામાં તૈનાત રહેશે. હજ કમિટીના નાહિન કાઝી, નાસીર બલોચ તથા આઇ એમ ઘાંચી દ્વારા લોકોને મોટા વાહનોને બદલે નાના વાહનોમાં સ્વજનોને રિસીવ કરવા આવવા માટે વિનંતી કરવામાં આવી છે. બીજી તરફ દરિયાપુરના મુસ્લિમ અગ્રણી ગ્યાસુદ્દીન શેખ દ્વારા પણ આ પ્રસંગે હજયાત્રીઓને કોઇ અગવડ પડે નહિ તેવી વ્યવસ્થા ગોઠવવા માટે પોલીસ અને હજ કમિટીને અનુરોધ કર્યો હતો.