ટંકારાના ધૂનડા-રસનાળ રોડ પર ગોઝારો અકસ્માત: કારની ટક્કરે બાઈક સવાર આધેડનું કરુણ મોત

ટંકારા તાલુકામાં ધૂનડા (ખાનપર)થી રસનાળ તરફ જવાના રસ્તા પર એક ગમખ્વાર અકસ્માત સર્જાયો છે. પૂરપાટ ઝડપે આવી રહેલી એક કારના ચાલકે વળાંક પાસે બાઈકને જોરદાર અડફેટે લેતા આધેડ વયના બાઈક ચાલકનું સારવાર દરમિયાન કમકમાટીભર્યું મોત નીપજ્યું છે. આ બનાવ અંગે મૃતકના મોટાભાઈએ ટંકારા તાલુકા પોલીસ મથકમાં ફરિયાદ નોંધાવતા પોલીસે ગુનો નોંધી આગળની કાર્યવાહી હાથ ધરી છે.
​વળાંક પાસે કારચાલકની બેદરકારી નડી

મળતી માહિતી મુજબ, મૂળ ટંકારાના રસનાળ ગામના વતની અને હાલ અમદાવાદના ઘાટલોડીયા વિસ્તારમાં આવેલ પરસોતમનગરમાં રહેતા રાજેશભાઈ ભગવાનજીભાઈ વડગામા (ઉં.વ. ૫૫)એ ટંકારા પોલીસ સ્ટેશનમાં ફરિયાદ નોંધાવી છે. ફરિયાદમાં જણાવ્યા અનુસાર, ટંકારાના ધૂનડા(ખાનપર)થી રસનાળ ગામ તરફ જવાના રસ્તા પર આવેલ એક વળાંક પાસે કાર નંબર GJ 3 NF 7975 ના ચાલકે પોતાની ગાડી ગફલતભરી રીતે દોડાવી હતી.

આ દરમિયાન સામેથી પોતાના બાઈક નંબર GJ 10 CD 6153 લઈને પસાર થઈ રહેલા રાજેશભાઈના નાના ભાઈ ઉમેશભાઈ ભગવાનજીભાઈ વડગામા (રહે. રસનાળ)ને કારે જોરદાર ટક્કર મારી હતી.
​સારવાર દરમિયાન આધેડે દમ તોડ્યો, પોલીસ તપાસ શરૂ

આ ભયાનક અકસ્માતમાં ઉમેશભાઈ વડગામાને માથાના તેમજ શરીરના અન્ય ભાગોમાં ગંભીર અને જીવલેણ ઈજાઓ પહોંચી હતી. અકસ્માત બાદ તેમને તાત્કાલિક સારવાર અર્થે હોસ્પિટલ ખસેડવામાં આવ્યા હતા, પરંતુ ટૂંકી સારવાર દરમિયાન જ તેમનું કરુણ મોત નીપજ્યું હતું. આ ઘટનાને પગલે વડગામા પરિવારમાં ભારે શોકનું મોજું ફરી વળ્યું છે. ટંકારા તાલુકા પોલીસે મૃતકના ભાઈની ફરિયાદના આધારે અકસ્માત સર્જી ફરાર થઈ ગયેલા કારચાલક સામે ગુનો દાખલ કરીને તેને ઝડપી પાડવા માટે ચક્રો ગતિમાન કર્યા છે.