Placeholder canvas

અમદાવાદમાં વહેલી સવારે ભારે જ્યારે જામનગર,રાજકોટ અને ગોંડલમાં સાંબેલાધાર વરસાદ નોંધાયો

રાજયમાં સતત મેઘમહેર વરસી રહી છે. જામનગર અને રાજકોટ જિલ્લામાં સાંબેલાધાર વરસાદ નોંધાયો છે. તો અમદાવાદ શહેરમાં વહેલી સવારે વરસેલા વરસાદને કારણે હાલાકીના દ્રશ્યો સર્જાયા હતા.

અમદાવાદ શહેરમાં વહેલી સવારે વરસાદ નોંધાયો

અમદાવાદમાં આજે વહેલી સવારે 5 કલાકે શરૂ થયેલો વરસાદ આશરે 1 કલાક વરસ્યો હતો. વરસાદને કારણે શહેરના નિચાણવાળા વિસ્તારોમાં પાણી ભરાયા હતા. કેટલાક વિસ્તારોમાં ગટર અને કેમિકલયુક્ત પાણી બેક મારતા સ્થાનિકો પરેશાન થયા હતા. નેશનલ હાઇવે નંબર-8 પર ગટરમાંથી કેમિકલયુક્ત પાણી બેક મારતા પાણી ભરાયા હતા. બરોડા એક્સપ્રેસ-વેથી જશોદાનગર જવાના સર્વિસ રોડ પર પાણી ભરાયા હતા. રાહદારીઓ ગટર અને કેમિકલયુક્ત પાણીમાંથી પસાર થવા મજબૂર બન્યા હતા.

જામનગર જિલ્લામાં સાંબેલાધાર વરસાદ નોંધાયો

જામનગર જિલ્લામાં પણ સાર્વત્રિક વરસાદ નોંધાયો હતો. છેલ્લા 24 કલાકમાં જિલ્લાભરમાં બેથી સાત ઇંચ વરસાદ નોંધાયો હોવાના અહેવાલો મળી રહ્યા છે. જામનગર જિલ્લાના કાલાવડમાં સાત ઇંચ વરસાદ ખાબક્યો છે. ધ્રોલમાં પણ સાડા છ ઇંચ વરસાદ ખાબક્યો છે. જામનગર શહેરમાં ત્રણ ઇંચ વરસાદ નોંધાયો છે. તો લાલપુર અને જામજોધપુરમાં બે-બે ઇંચ વરસાદ નોંધાયો છે. મોટીબાણુગાર, રામપર, ધુંવાવ સહિતના ગામોમાં પાણી ભરાયા છે. કોઝવે પર બે ફૂટથી વધુ પાણી ભરાતા વાહનવ્યવહારને અસર થઇ છે.

જામનગરનો રણજીતસાગર ડેમ ઓવરફલો થયો

ભારે વરસાદને કારણે જામનગરનો રણજીત સાગર ડેમ ઓવરફ્લો થયો છે. રણજીત સાગર ડેમમાં ઓક્ટોબર સુધી ચાલે એટલું જ પાણી હતું. ભારે વરસાદને પગલે એક જ રાતમાં જળસંકટ દૂર થયું છે.

રાજકોટ જિલ્લામાં સાંબેલાધાર વરસાદ નોંધાયો

તો રાજકોટ જિલ્લામાં છેલ્લા 24 કલાકમાં સાર્વત્રિક મેઘમહેર થઇ છે. જિલ્લાના લોધિકામાં 5.5 ઈંચ, ગોંડલમાં 5 ઈંચ વરસાદ ખાબક્યો છે. રાજકોટ શહેરમાં સરેરાશ 4 ઈંચ વરસાદ નોંધાયો છે. તો જિલ્લાના ઉપલેટા, કોટડા સાંગાણી, જેતપુર, પડધરીમાં 3 ઈંચ વરસ્યો છે.

વાંકાનેરમાં વહેલી સવારે વરસાદ નોંધાયો

વાંકાનેર તાલુકમાં આજે વહેલી સવારે બાર વાગ્યાથી વરસાદ શરૂ થયો હતો જે એક વાગ્યા સુધી ખૂબ સારો વરસાદ પડયો એકાદ કલાકમાં આશરે દોઢેક ઈંચ વરસાદ પડયો હતો ત્યારે વહેલી સવારે ફરી પાછો વરસાદ આવ્યો હતો અને આ દરમ્યાન છાંટા તો ચાલુ રહ્યા હતા ગતરાત્રે વાંકાનેર શહેર અને તાલુકામાં વધતા ઓછા પ્રમાણમાં વરસાદ છે આશરે બે થી અઢી ઇંચ વરસાદ પડ્યાના વાવડ મળી રહ્યા છે.

આ સમાચારને શેર કરો